पाचगणी न्यूज नेटवर्क
भिलार : पुस्तकांचे गाव म्हणून ओळखल्या जाणाऱ्या भिलार येथील जुने गावठाण भागात श्री सोनारसिद्धी आणि जोगेश्वरी मातेच्या वार्षिक यात्रेचे औचित्य साधून, मंदिराच्या भव्य नामफलकाचे अनावरण करण्यात आले. मान्यवरांच्या उपस्थितीत पार पडलेल्या या सोहळ्यामुळे मंदिराच्या परिसराला एक नवी ओळख प्राप्त झाली असून ग्रामस्थांमध्ये आनंदाचे वातावरण आहे.
यात्रेच्या मंगलमयी वातावरणात प्रवीण भिलारे, वसंत भिलारे, सुरेश भिलारे यांसह गावातील इतर मान्यवरांच्या हस्ते या फलकाचे उद्घाटन करण्यात आले. “भिलार हे पर्यटनाच्या दृष्टीने महत्त्वाचे गाव असून, येथील ग्रामदैवताच्या मंदिराचा हा नामफलक येणाऱ्या भाविकांसाठी आणि पर्यटकांसाठी मार्गदर्शक ठरेल,” अशी भावना यावेळी मान्यवरांनी व्यक्त केली.
नामफलक अनावरणानंतर यात्रेच्या मुख्य धार्मिक विधींना सुरुवात झाली. पुजाऱ्यांच्या हस्ते अभिषेक आणि महापूजा करण्यात आली. देवीला हळद-कुंकू, फुले आणि नारळ अर्पण करण्यासाठी भक्तांच्या लांबच लांब रांगा लागल्या होत्या. अनेक भाविकांनी श्रद्धेने आपले नवस फेडले आणि मातेची ओटी भरली.
या सोहळ्याचे आणखी एक आकर्षण म्हणजे दुपारी रंगलेला पारंपरिक भजन सोहळा. टाळ-मृदुंगाच्या साथीने आणि “आईचा जयघोष” करत भक्तांनी संपूर्ण परिसर निनादवून सोडला. गावातील भजन मंडळींनी सादर केलेल्या देवीच्या गाण्यांमुळे उपस्थित भाविक भक्तीत दंग झाले होते.
यात्रेसाठी आलेल्या भाविकांच्या सोयीसाठी स्वयंसेवकांनी चोख व्यवस्था ठेवली होती. पिण्याचे पाणी आणि सावलीच्या नियोजनासह सायंकाळी महाप्रसादाचे वाटप करण्यात आले. अतिशय शिस्तबद्ध पद्धतीने पार पडलेल्या या यात्रेचा समारोप भक्तीमय वातावरणात झाला.
या प्रसंगी भिलारमधील ज्येष्ठ नागरिक, युवक कार्यकर्ते आणि महिला भाविक मोठ्या संख्येने उपस्थित होते.
