पांचगणी न्यूज नेटवर्क
रामवाडी (ता. जावली): संकटांशी झुंजत, परिस्थितीची गरिबी पचवत जिद्दीच्या जोरावर शिखर गाठता येते, हे जावली तालुक्यातील रामवाडी येथील विक्रम दत्तात्रय पाडळे याने सिद्ध केले आहे. महाराष्ट्र लोकसेवा आयोगामार्फत (MPSC) २०२४ मध्ये घेण्यात आलेल्या परीक्षेत विक्रमने घवघवीत यश मिळवत ‘टॅक्स असिस्टंट’ (कर साहाय्यक) या पदावर आपली मोहोर उमटवली आहे. संपूर्ण राज्यामध्ये ४२ वा रँक प्राप्त करत त्याने रामवाडीसह संपूर्ण जावली तालुक्याच्या शिरपेचात मानाचा तुरा खोवला आहे.
विक्रम पाडळे यांचा प्रवास हा संघर्षाची एक प्रेरणादायी गाथा आहे. अत्यंत हलाखीच्या परिस्थितीतून पुढे येताना त्याने कधीही हार मानली नाही. रामवाडी येथील प्राथमिक शाळेत शिक्षण पूर्ण केल्यानंतर पुढील शिक्षणासाठी त्याने साताऱ्याची वाट धरली. घरची बेताची परिस्थिती असूनही त्याने आपल्या ध्येयापासून नजर ढळू दिली नाही. या कठीण काळात गावातील मित्र, तरुण वर्ग आणि ग्रामस्थांनी त्याच्या जिद्दीला ओळखून वर्गणी गोळा करत त्याला शिक्षणासाठी मोलाचा आधार दिला. आज मिळालेल्या या यशात आपल्या गावाची आणि ग्रामस्थांच्या प्रेमाची मोठी शिदोरी आहे, याची जाणीव विक्रमने कृतज्ञतापूर्वक व्यक्त केली आहे.
सातव्या प्रयत्नात हे यश संपादन करत त्याने आपली जिद्द आणि सातत्य दाखवून दिले आहे. त्याच्या या नेत्रदीपक कामगिरीबद्दल गावात जल्लोषाचे वातावरण असून, ग्रामस्थ आणि युवकांनी त्याची वाजतगाजत मिरवणूक काढली. या वेळी विक्रमवर शुभेच्छांचा वर्षाव करण्यात आला. एका सामान्य कुटुंबातील मुलाने कष्ट आणि संयमाच्या बळावर प्रशासकीय सेवेत प्रवेश केल्यामुळे परिसरात कौतुकाचा वर्षाव होत आहे. विक्रमचे हे यश गावातील इतर तरुण पिढीसाठी नक्कीच प्रेरणादायी ठरेल.
