पांचगणी न्यूज नेटवर्क
पांचगणी : निसर्गरम्य काटवली गावातील श्री हनुमान मंदिरात परंपरेनुसार श्री हनुमान जन्मोत्सव सोहळा अत्यंत चैतन्यपूर्ण आणि भक्तीमय वातावरणात संपन्न झाला. यंदा या उत्सवाचे औचित्य अधिक खास ठरले आहे, कारण गावात २४ व्या अखंड हरिनाम सप्ताहाचे आयोजन करण्यात आले असून, यामुळे अवघ्या काटवली परिसरात आध्यात्मिक ऊर्जेचा संचार झाला आहे. जन्मोत्सवानिमित्त पहाटेपासूनच भाविकांनी मंदिरात दर्शनासाठी मोठी गर्दी केली होती, तर महिलांनी मोठ्या संख्येने उपस्थित राहून जन्माचा पाळणा गायला.
श्री हनुमान जन्मोत्सवाच्या दिवशी पहाटेपासूनच मंदिराचा परिसर ‘राम लक्ष्मण जानकी, जय बोला हनुमान की’ आणि ‘दास रामाचा हनुमंत झाला’ अशा भक्तिगीतांनी आणि भजनांनी दुमदुमून गेला होता. पहाटेची काकड आरती झाल्यानंतर मंदिराच्या गाभाऱ्यात सुवासिक फुलांची आकर्षक सजावट करण्यात आली होती. अंगणात काढलेल्या देखण्या रांगोळ्यांनी परिसराचे सौंदर्य अधिकच खुलवले होते. सूर्योदयाच्या मंगल समयी महिलांनी पारंपारिक पाळणा म्हणत श्री हनुमानाचा जन्मोत्सव साजरा केला. यानंतर सुंठवडा वाटप आणि श्रींच्या मूर्तीवर पुष्पवृष्टी करण्यात आली. या सोहळ्यासाठी गावातील आणि परिसरातील भाविकांनी रांगा लावल्या होत्या, विशेषतः महिला भाविकांचा सहभाग लक्षणीय होता.
काटवली गावाचे श्रद्धास्थान असलेल्या या मंदिरात यंदा २४ वा अखंड हरिनाम सप्ताह सुरू असल्याने उत्सवाचा आनंद द्विगुणित झाला आहे. सप्ताहाच्या निमित्ताने मंदिरात विविध धार्मिक कार्यक्रम, कीर्तन आणि प्रवचनांची रेलचेल असून भाविकांमध्ये मोठा उत्साह पाहायला मिळत आहे. काटवलीप्रमाणेच शेजारील पांचगणी, भिलार, दापवडी, गोडवली आणि घोटेघर येथील हनुमान मंदिरांतही विविध धार्मिक विधी पार पडले. दर्शनानंतर भाविकांनी महाप्रसादाचा लाभ घेतला. श्री हनुमान जन्मोत्सव आणि हरिनाम सप्ताहाच्या या दुहेरी योगायोगामुळे संपूर्ण काटवली गाव भक्तीच्या रंगात न्हाऊन निघाले आहे.
