पाचगणी न्यूज नेटवर्क
तापोळा : शेतकऱ्यांचे प्रलंबित प्रश्न, वनविभागाच्या जाचक अटी रद्द करणे आणि वन्य प्राण्यांच्या हल्ल्यात मृत पावलेल्यांच्या कुटुंबीयांना शासकीय मदत मिळवून देण्याच्या प्रमुख मागण्यांसाठी ‘१०५ गाव समाज संघटने’च्या नेतृत्वाखाली आयोजित बहुचर्चित बैठक आज वनविभागाच्या अधिकाऱ्यांसमवेत यशस्वीपणे पार पडली. हजारो समाजबांधवांच्या विराट उपस्थितीत झालेल्या या बैठकीत वनविभागाने बहुतांश मागण्यांवर सकारात्मक प्रतिसाद दिल्याने ‘१०५ गाव समाज एकजुटीचा विजय झाला’ असा जल्लोष समाजबांधवांनी केला.
या महत्त्वपूर्ण बैठकीला उपवनसंरक्षक अधिकारी श्री. अमोल सातपुते आणि मोहिते साहेब हे प्रमुख उपस्थित होते. समाजाच्या वतीने अधिकाऱ्यांना सविस्तर निवेदन सादर करण्यात आले, ज्यावर अनेक समाजबांधवांनी आक्रमकपणे आणि प्रभावीपणे आपले मुद्दे मांडले.
बैठकीतील प्रमुख निर्णय आणि समाजबांधवांना मिळालेले आश्वासन
संघटित समाजाच्या रेट्यामुळे वनअधिकाऱ्यांनी खालील महत्त्वपूर्ण मुद्द्यांवर त्वरित आणि सकारात्मक निर्णय घेतले:
मृत आणि जखमींना मदत: वन्य प्राण्यांच्या हल्ल्यात मृत आणि जखमी झालेल्या शेतकऱ्यांच्या कुटुंबांना शासकीय मदत देण्यात आली असून, उर्वरित मदत रक्कम लवकरच वितरित केली जाईल.
पीक नुकसान भरपाई: शेतीचे नुकसान झालेल्या शेतकऱ्यांच्या नुकसानीचा तातडीने पंचनामा करून त्यांना त्वरित आर्थिक मदत देण्यात येणार आहे.
विकास कामांना अडथळा नाही: फॉरेस्ट विभागातून जाणाऱ्या रस्ते, शेतमार्ग, वीजखांब आणि इंटरनेट केबल आदी अत्यावश्यक कामांमध्ये यापुढे कोणताही अडथळा आणला जाणार नाही.
शेती संरक्षण योजना: शेतीचे वन्य प्राण्यांपासून संरक्षण करण्यासाठी उपलब्ध शासकीय योजनांची माहिती देऊन त्यासाठी आवश्यक निधी उपलब्ध करून दिला जाईल.
फायरगन वापरास परवानगी: शेतीचे संरक्षण करण्यासाठी फायरगनचा (प्राणीहत्या न करता) वापर करण्यास परवानगी दिली जाईल.
प्रलंबित खटले निकाली: वनविभागाची हद्द स्पष्ट करून अनेक वर्षांपासून प्रलंबित असलेले वनविषयक खटले निकाली काढले जातील.
नोकरीचा प्रस्ताव: वन्य प्राण्यांच्या हल्ल्यात मृत्यू झालेल्या शेतकऱ्यांच्या वारसांना शासकीय नोकरी देण्याचा प्रस्ताव शासनाकडे सादर केला जाईल.
खाजगी जमिनींचे संरक्षण: “वनसदृश्य” या नावाखाली खाजगी जमिनी वनविभाग ताब्यात घेणार नाही, याची खात्री अधिकाऱ्यांनी दिली.
झाडतोडीवरील सवलत: घर बांधकाम किंवा इतर कामांसाठी मालकीच्या जमिनीवरील झाडे तोडल्यास आता दंडात्मक कारवाई केली जाणार नाही.
याव्यतिरिक्त, स्थानिक स्तरावर वन व्यवस्थापन समिती स्थापन करून प्रभावी अंमलबजावणी करण्याचे तसेच वनविभाग आणि १०५ गाव सामाजिक संघटना यांच्यात प्रश्नांचे त्वरित निराकरण करण्यासाठी सहामाही/वार्षिक समन्वयक बैठक घेण्याचे ठरले.
या बैठकीचे उत्कृष्ट संचालन संजय संकपाळ गुरुजी यांनी केले. समाजाच्या वतीने संजय गायकवाड, गणेश उतेकर, संतोष कदम, बाबुराव संकपाळ, सुभाष सोंडकर, प्रकाश गुरुजी, संजय देसाई, समीर चव्हाण, डी.के. जाधव यांच्यासह अनेक कार्यकर्त्यांनी प्रभावीपणे मुद्दे मांडले.
शेतकऱ्यांच्या प्रश्नांवर ठोस तोडगा काढण्यासाठी ही बैठक ऐतिहासिक ठरली. “१०५ गाव समाज संघटनेचा हा विजय म्हणजे जनतेच्या एकतेचा विजय आहे,” असे मत अनेक उपस्थितांनी व्यक्त केले. या बैठकीतून १०५ गाव समाजाची संघटित शक्ती, एकजुटीचा आवाज आणि प्रशासनाशी संवादाची रचनात्मक दिशा स्पष्ट झाली.
