पांचगणी न्यूज नेटवर्क
पाचगणी, ता. ०६ :शिक्षण आणि आरोग्य या समाजविकासाच्या दोन महत्त्वाच्या पैलूंना साद घालत, इनरव्हील क्लब पाचगणीच्या वतीने आज पाचगणी येथील नगरपालिका शाळा क्रमांक दोनमध्ये कौतुकास्पद उपक्रम राबविण्यात आला. विद्यार्थिनींच्या बौद्धिक आणि शारीरिक विकासासाठी अत्याधुनिक ‘अलेक्सा डॉल’ आणि क्रीडा साहित्याची भेट देण्यात आली, तर दंत तपासणी शिबिराद्वारे त्यांच्या आरोग्याची निगा राखण्याचा संदेश देण्यात आला. इनरव्हील क्लबच्या या उपक्रमामुळे शैक्षणिक क्षेत्रात आधुनिक तंत्रज्ञानाचा वापर आणि आरोग्यविषयक जागृतीचा एक नवा आदर्श निर्माण झाला आहे.
आजच्या प्रगत युगात ग्रामीण भागातील विद्यार्थिनींनाही तंत्रज्ञानाची जोड मिळावी, या उद्देशाने इनरव्हील क्लबने पुढाकार घेत शाळेला ‘अलेक्सा डॉल’ हे अत्याधुनिक साधन उपलब्ध करून दिले आहे. यामुळे विद्यार्थिनींचे सामान्य ज्ञान (जीके) आणि इंग्रजी भाषेचे ज्ञान वृद्धिंगत होण्यास मोठी मदत होणार आहे. कृत्रिम बुद्धिमत्तेवर आधारित या साधनाच्या माध्यमातून खेळाखेडातून शिक्षण मिळणे सोपे होणार असून, विद्यार्थिनींच्या ज्ञानात मोलाची भर पडणार आहे. त्याचबरोबर मैदानी खेळांसाठी आवश्यक असलेले विविध क्रीडा साहित्यही शाळेला प्रदान करण्यात आले, ज्यामुळे विद्यार्थिनींच्या शारीरिक सुदृढतेला चालना मिळणार आहे.
शैक्षणिक साहित्यासोबतच विद्यार्थिनींच्या आरोग्याकडेही विशेष लक्ष देण्यात आले. सुप्रसिद्ध दंत चिकित्सक डॉ. संपदा वाचल यांनी शाळेतील सुमारे २०० विद्यार्थिनींच्या दातांची सखोल तपासणी केली. केवळ तपासणी करून न थांबता, डॉ. वाचल यांनी विद्यार्थिनींना दातांची निगा कशी राखायची, चॉकलेट किंवा गोड पदार्थ खाल्ल्यानंतर होणारे दुष्परिणाम आणि योग्य पद्धतीने ब्रश करण्याची पद्धत यावर सविस्तर मार्गदर्शन केले. लहान वयातच आरोग्याबाबत सजगता निर्माण व्हावी, हा यामागचा मुख्य हेतू होता.
या महत्त्वपूर्ण उपक्रमासाठी इनरव्हील क्लब पाचगणीच्या अध्यक्षा सौ. अंजना पारठे, सेक्रेटरी सौ. चांदनी थदानी, सौ. मनिषा शिंदे, सौ. सुप्रिया माने, सौ. कल्पना पुरोहित, सौ. योगिता भिलारे, सिमरन खान, सौ. सोनाली साळुंखे, सौ. प्रतिभा कासुर्डे आणि सौ. प्रियांका भंडारी यांसह क्लबचे सर्व सदस्य मोठ्या संख्येने उपस्थित होते. इनरव्हील क्लबने वेळोवेळी केलेल्या या सामाजिक आणि शैक्षणिक सहकार्याबद्दल शाळेचे मुख्याध्यापक श्री. लक्ष्मण हिरवे यांनी मन:पूर्वक आभार मानले. समाजातील अशा दानशूर संस्थांच्या मदतीमुळे जिल्हा परिषद आणि नगरपालिका शाळांमधील गुणवत्ता उंचावण्यास मदत होत असल्याची भावना या वेळी व्यक्त करण्यात आली. इनरव्हील क्लबच्या या कार्याचे पाचगणी परिसरातून कौतुक होत आहे.
