पाचगणी न्यूज नेटवर्क
पाचगणी : महाबळेश्वर तालुक्यातील पांगारी गावच्या विकासाला नवी गती देणाऱ्या तब्बल २ कोटी ४२ लाख रुपयांच्या विविध विकासकामांचे भूमिपूजन नुकतेच मोठ्या उत्साहात संपन्न झाले. जन्नीमाता मंदिर परिसरात झालेल्या या कार्यक्रमाला राजकीय आणि सामाजिक क्षेत्रातील मान्यवरांची उपस्थिती होती. या विकासनिधीमुळे गावातील रस्ते आणि सुरक्षेचा प्रश्न मार्गी लागणार असल्याने ग्रामस्थांमधून समाधान व्यक्त होत आहे.
जिल्हा मध्यवर्ती सहकारी बँकेचे संचालक राजेंद्र शेठ राजपुरे यांच्या हस्ते या कामांचा श्रीगणेशा करण्यात आला. यावेळी जिल्हा नियोजन समितीचे सदस्य प्रवीण शेठ भिलारे, शशी बापू भिलारे, राम गोळे यांची प्रमुख उपस्थिती होती. या निधीतून गावातील मुख्य रस्त्याचे नूतनीकरण, महत्त्वाच्या अंतर्गत रस्त्यांचे काँक्रिटीकरण आणि आपत्ती निवारण निधीतून संरक्षक भिंतीची उभारणी करण्यात येणार आहे.
पांगारी गावाचा सर्वांगीण विकास हेच आमचे मुख्य उद्दिष्ट असून, दर्जेदार कामांच्या माध्यमातून पांगारीचा चेहरामोहरा बदलला जाईल,पण गावातील गट तट विसरून आगामी निवडणुकीत गावच्या एकीच्या माध्यमातून आमच्या पाठीशी एकमुखाने ठाम राहण्याची जबाबदारी तुमची असल्याचा ‘ विश्वास यावेळी राजेंद्रशेठ राजपुरे यांनी व्यक्त केला.
कार्यक्रमाला सरपंच संदीप पांगारे, माजी सरपंच जाणू पांगारे, सर्जेराव पांगारे, सौ. मंदा पांगारे, पोलीस पाटील मनीषा पांगारे, दिनकर पांगारे, रविंद्र पांगारे, गणेश पांगारे, वैभव माने, नारायण उंबरकर, सुरेंद्र पांगारे, बाजीराव आंब्राळे, संतोष पांगारे, आकाश पांगारे, मंगेश पांगारे, रविंद्र शिंदे यांसह ग्रामस्थ मोठ्या संख्येने उपस्थित होते.
विशेषतः या कार्यक्रमाला गावातील महिला मंडळ व बचत गटांच्या महिलांनी मोठ्या संख्येने उपस्थित राहून विकासकामांचे स्वागत केले. यामध्ये आशा उंबरकर, पुष्पा पांगारे, प्रिया पांगारे, शामल पांगारे, नंदा शिंदे, सुप्रिया पांगारे यांचा सहभाग होता.
