पाचगणी न्यूज नेटवर्क
पाचगणी : लग्नाचे आमिष दाखवून एका १२ वर्षीय अल्पवयीन मुलीचे अपहरण करणाऱ्या आरोपीला पाचगणी पोलिसांनी मोठ्या कौशल्याने बेड्या ठोकल्या आहेत. सनी गौतम कुचेकर (वय २६, रा. मुगाव, जि. धाराशिव) असे अटक करण्यात आलेल्या आरोपीचे नाव आहे. तांत्रिक तपासाचे आव्हान पेलत पोलिसांनी आरोपीला अंबरनाथ (जि. ठाणे) येथून ताब्यात घेतले.
मिळालेल्या माहितीनुसार, पाचगणी येथील एका १२ वर्षे ८ महिने वयाच्या मुलीसोबत आरोपी सनी कुचेकर याची ओळख होती. मुलगी अल्पवयीन आहे हे माहीत असूनही, त्याने तिला लग्नाचे आमिष दाखवले. २४ डिसेंबर २०२५ रोजी दुपारी ३ वाजेच्या सुमारास त्याने मुलीला तिच्या पालकांच्या ताब्यातून पळवून नेले. याप्रकरणी मुलीच्या वडिलांनी पाचगणी पोलीस ठाण्यात तक्रार दाखल केली होती. पोलिसांनी तातडीने भा.न्या.सं. कलम १३७ आणि पोक्सो कायद्यांतर्गत गुन्हा दाखल केला.
प्रकरण संवेदनशील असल्याने सातारा जिल्हा पोलीस अधीक्षक तुषार दोशी यांनी तपासाचे आदेश दिले होते. आरोपी आपला मोबाईल फोन बंद ठेवून वारंवार ठिकाणे बदलत होता. पोलिसांनी तपासासाठी विशेष पथके तयार करून परांडा (धाराशिव) आणि करमाळा (सोलापूर) येथे शोध घेतला, मात्र आरोपी मिळून आला नाही. अखेर तांत्रिक तपासाच्या आधारे आरोपी आणि पीडित मुलगी अंबरनाथमध्ये असल्याची माहिती मिळाली. पथकाने तातडीने त्याठिकाणी धाव घेऊन आरोपीला अटक केली.
पीडित मुलीला सुरक्षितपणे तिच्या पालकांच्या ताब्यात देण्यात आले आहे. आरोपी सनी कुचेकर याला न्यायालयात हजर केले असता, त्याची न्यायालयीन कोठडीत रवानगी करण्यात आली आहे.
ही कारवाई पोलीस अधीक्षक तुषार दोशी, अपर पोलीस अधीक्षक वैशाली कडूकर, उपविभागीय पोलीस अधिकारी सुनील साळुंखे यांच्या मार्गदर्शनाखाली पाचगणीचे प्रभारी अधिकारी सहाय्यक पोलीस निरीक्षक दिलीप पवार, उपनिरीक्षक बालाजी सोनुने, रवींद्र कदम, श्रीकांत कांबळे, निलेश माने, सीमा फरांदे आणि सुमित मोहिते यांच्या पथकाने केली. या कामगिरीबद्दल पोलीस अधीक्षकांनी पथकाचे कौतुक केले आहे.
