पाचगणी न्यूज नेटवर्क
महाबळेश्वर : निसर्गाचा अनमोल वारसा लाभलेल्या महाबळेश्वरच्या वनराईत सध्या वन्यजीवांचा वावर वाढल्याचे सुखद चित्र दिसत आहे. सह्याद्रीच्या पर्वत रांगांमधील या भागात काल रात्री मेटतळेकडे जाणाऱ्या युवकांना एका रुबाबदार बिबट्याचे दर्शन झाले. निसर्गसौंदर्याने नटलेल्या या पर्यटनस्थळाच्या जैवविविधतेत बिबट्याचे अस्तित्व हे येथील अन्नसाखळीतील समृद्धीचे लक्षण मानले जात आहे.
मिळालेल्या माहितीनुसार, काही स्थानिक युवक रात्रीच्या वेळी महाबळेश्वरहून मेटतळेच्या दिशेने प्रवास करत होते. वाटेत जन्नीमाता मंदिर परिसरात रस्त्याच्या कडेला असलेल्या लोखंडी रेलिंगखाली एक बिबट्या निवांत बसलेला त्यांना दिसला. पिवळ्या अंगावर काळे ठिपके, लांब सडक शेपूट आणि सुदृढ शरीरयष्टी असलेला हा बिबट्या पाहून युवक थक्क झाले. बिबट्याचे हे देखणे रूप पाहून त्यांनी आपल्या मोबाईलमध्ये त्याचे फोटो आणि व्हिडिओ टिपण्याचा मोह आवरला नाही.
महाबळेश्वरचा परिसर घनदाट जंगलांनी व्यापलेला असून येथे रानगवा, सांबर, भेकर, रानकुत्रे आणि सायाळ यांसारख्या प्राण्यांचे वास्तव्य आहे. या अन्नसाखळीत बिबट्या हा सर्वोच्च स्थानी असून, अनेक वर्षांपासून तो या वातावरणाशी एकरूप झाला आहे. स्थानिक नागरिक आणि पर्यटकांना अधूनमधून बिबट्याचे दर्शन घडत असते, जे येथील जंगलाच्या सुदृढ आरोग्याचे प्रतीक आहे.
“बिबट्याचे दर्शन होणे ही निसर्गप्रेमींसाठी एक पर्वणीच असते. निसर्गसौंदर्याचा तो एक महत्त्वाचा भाग असून वन्यजीवांचे हे अस्तित्व टिकवून ठेवणे ही आपली जबाबदारी आहे.”
बिबट्याच्या या दर्शनामुळे परिसरात सध्या कुतूहलाचे वातावरण असून, रात्रीच्या वेळी प्रवास करताना खबरदारी घेण्याचे आवाहनही निसर्गप्रेमींकडून केले जात आहे.
