पांचगणी न्यूज नेटवर्क
पांचगणी : क्रीडा संस्कृतीचे जतन करणाऱ्या पांचगणी व्यायाम मंडळाच्या वतीने आयोजित भव्य हौशी वजनी गट कबड्डी स्पर्धांच्या माध्यमातून पुन्हा एकदा कै. भाऊसाहेब भिलारे स्टेडियमवर कबड्डीचा घुमणारा आवाज ऐकायला मिळणार आहे. सलग ८६ वर्षांच्या सातत्यपूर्ण आयोजनाचा वारसा लाभलेल्या या स्पर्धेत सहभागी होण्यासाठी जास्तीत जास्त संघांनी आपली नाव नोंदणी करून क्रीडा महोत्सवात सामील व्हावे, असे आवाहन मंडळाच्या वतीने करण्यात आले आहे.
७ मे ते १० मे २०२६ या काळात रंगणाऱ्या या स्पर्धेत ३५ किलो, ५० किलो आणि ७० किलो अशा तीन गटांमध्ये सामने पार पडणार असून, विजेत्या संघांना तब्बल लाखो रुपयांची बक्षिसे आणि मानाचे चषक जिंकण्याची सुवर्णसंधी आहे.
या भव्य स्पर्धेत ७० किलो गटासाठी प्रथम क्रमांक ३५ हजार, ५० किलोसाठी २५ हजार आणि ३५ किलोसाठी २१ हजार रुपये रोख स्वरूपात दिले जाणार आहेत. यासोबतच प्रत्येक गटातील उपविजेत्यांना आणि उत्कृष्ट खेळाडूंनाही रोख बक्षिसांनी गौरविण्यात येणार आहे. स्पर्धेची शिस्त आणि दर्जा टिकवण्यासाठी केवळ मर्यादित कालावधीतच प्रवेश अर्ज स्वीकारले जाणार असून, नोंदणीची अंतिम मुदत ३ मे २०२६ रोजी सायंकाळी ६ वाजेपर्यंतच आहे. ५० किलो गटासाठी ७०० रुपये आणि ७० किलो गटासाठी १,००० रुपये प्रवेश शुल्क असून, नियमावलीनुसार प्रत्येक गटासाठी वेगळी ऑडिट फी देखील निश्चित करण्यात आली आहे.
नाव नोंदणीसाठी आणि स्पर्धेच्या अधिक माहितीसाठी इच्छुकांनी तातडीने संपर्क साधणे आवश्यक आहे. यासाठी श्री. शेखर भिलारे (९३२५५८३५८५), श्री. शरद कासुर्डे (९३२५५८३५८५), श्री. संतोष गोळे (७०२०६६८९२४), श्री. राजू दुधाने (९१५८९११२४८) किंवा श्री. तानाजी भिलारे (९७६४३५६५३७) यांच्याशी भ्रमणध्वनीवर संपर्क साधता येईल. ८६ वर्षांची परंपरा असलेल्या या मानाच्या स्पर्धेत आपले कौशल्य सिद्ध करण्यासाठी सातारा जिल्ह्यातील आणि बाहेरील जास्तीत जास्त क्रीडा मंडळांनी आपला सहभाग निश्चित करावा, असे आवाहन पांचगणी व्यायाम मंडळाचे वतीने नानासाहेब कासुर्डे आणि राजेंद्र शेठ राजपुरे यांनी केले आहे.
