थंडीच्या कडाक्यात पहाटेपासून राबणाऱ्या हातांना दिलासा; नवनिर्वाचित नगरसेवकाची सामाजिक बांधिलकी
पाचगणी (प्रतिनिधी) : ७ जानेवारी
महाराष्ट्राचे नंदनवन म्हणून ओळखल्या जाणाऱ्या पाचगणी शहराला लख्ख ठेवण्यासाठी अहोरात्र कष्ट करणाऱ्या सफाई कामगारांच्या आरोग्याप्रति संवेदनशीलता जपत, नवनिर्वाचित नगरसेवक प्रसाद कारंजकर यांनी एक स्तुत्य उपक्रम राबविला आहे. कडाक्याच्या थंडीतही शहराच्या स्वच्छतेसाठी मैदानावर असणाऱ्या या ‘स्वच्छता दूतां’ना कारंजकर यांच्या पुढाकारातून मोफत जॅकेटचे वाटप करण्यात आले.
पाचगणीमध्ये सध्या थंडीचा जोर वाढला आहे. पहाटेचा गारठा आणि रात्री उशिरापर्यंत चालणारे काम यामुळे सफाई कामगारांच्या आरोग्याचा प्रश्न निर्माण होतो. हीच गरज ओळखून प्रसाद कारंजकर यांनी सामाजिक बांधिलकीतून या कामगारांना दर्जेदार जॅकेट भेट दिली. यामुळे कामाच्या ठिकाणी या कामगारांना थंडीपासून संरक्षण मिळण्यासोबतच एक प्रकारे मायेची ऊबही मिळाली आहे.
याप्रसंगी बोलताना नगरसेवक प्रसाद कारंजकर म्हणाले की, “स्वच्छ पाचगणीचे स्वप्न पूर्ण करणारे सफाई कामगार हे शहराचे खरे शिल्पकार आहेत. पर्यटक जेव्हा पाचगणीच्या सौंदर्याचे कौतुक करतात, तेव्हा त्यामागे या कामगारांचा घाम असतो. थंडीच्या दिवसांत त्यांच्या कष्टाची दखल घेऊन त्यांना सुरक्षितता प्रदान करणे, हे माझे कर्तव्य आहे. हा केवळ एक वस्तू वाटपाचा कार्यक्रम नसून त्यांच्या कामाप्रती कृतज्ञता व्यक्त करण्याचा हा छोटासा प्रयत्न आहे.”
जॅकेट मिळाल्यानंतर सफाई कामगारांच्या चेहऱ्यावर समाधानाचे हास्य उमलले होते. “थंडीमुळे पहाटे काम करताना खूप त्रास व्हायचा, पण आता या जॅकेटमुळे आम्हाला मोठा आधार मिळाला आहे,” अशा भावना यावेळी कामगारांनी व्यक्त केल्या. लोकप्रतिनिधी म्हणून केवळ आश्वासने न देता, प्रत्यक्ष गरजा ओळखून कामाला सुरुवात केल्याबद्दल शहरात प्रसाद कारंजकर यांच्या या उपक्रमाचे सर्वत्र कौतुक होत आहे.
समाजातील इतर दानशूर व्यक्तींनी आणि सामाजिक संस्थांनीदेखील अशा प्रकारे प्रत्यक्ष मैदानावर राबणाऱ्या घटकांसाठी मदतीचा हात पुढे करावा, असे आवाहन यावेळी करण्यात आले.
