पाचगणी न्यूज नेटवर्क
महाबळेश्वर | महाबळेश्वर नगरपरिषदेच्या नगराध्यक्षपदी नवनिर्वाचित श्री. सुनील शिंदे यांनी आज मोठ्या उत्साहात आणि जल्लोषपूर्ण वातावरणात अधिकृतपणे पदभार स्वीकारला. खासदार नितीन काका पाटील यांच्या प्रमुख उपस्थितीत पार पडलेल्या या पदग्रहण सोहळ्याने महाबळेश्वरच्या राजकीय वातावरणात एक नवचैतन्य निर्माण केले आहे. नगरपरिषदेच्या मुख्य प्रवेशद्वारापासूनच झालेली फटाक्यांची आतिषबाजी, कार्यकर्त्यांचा उत्साह आणि नागरिकांची मोठी गर्दी यामुळे संपूर्ण परिसर आनंदमय झाला होता.
सोहळ्याच्या सुरुवातीला खासदार नितीन काका पाटील, नवनिर्वाचित नगराध्यक्ष सुनील शिंदे तसेच सर्व नगरसेवकांचे पुष्पगुच्छ देऊन जंगी स्वागत करण्यात आले. त्यानंतर सर्व लोकप्रतिनिधींनी छत्रपती शिवाजी महाराज यांच्या पुतळ्यास पुष्पहार अर्पण करून अभिवादन केले. शिवरायांना वंदन केल्यानंतर नगराध्यक्ष शिंदे यांनी आपल्या दालनात प्रवेश करताना त्यांच्या आई व पत्नी यांच्या हस्ते औक्षण करून घेतले. अत्यंत भावूक आणि मंगलमय वातावरणात फीत कापून त्यांनी कार्यालयात प्रवेश केला आणि औपचारिकरित्या नगराध्यक्षपदाची सूत्रे हाती घेतली.
या पदग्रहण सोहळ्यानिमित्त आयोजित स्वागत समारंभाला राजकीय व सामाजिक क्षेत्रातील अनेक मान्यवरांची उपस्थिती लाभली. यावेळी बोलताना खासदार नितीन काका पाटील यांनी सुनील शिंदे यांचे अभिनंदन केले आणि महाबळेश्वरच्या विकासासाठी सर्वांनी पक्षभेद विसरून एकत्र काम करण्याचे आवाहन केले. या प्रसंगी जिल्हा मध्यवर्ती बँकेचे संचालक राजू शेठ राजपुरे, संजय गायकवाड, नगरपरिषदेचे मुख्याधिकारी योगेश पाटील, श्रीनिवास शिंदे, राष्ट्रवादी काँग्रेसचे सर्व नवनिर्वाचित नगरसेवक, अपक्ष नगरसेविका स्मिता पाटील, भाजपचे नगरसेवक रवींद्र कुंभारदरे यांच्यासह विविध राजकीय पक्षांचे पदाधिकारी, सामाजिक कार्यकर्ते आणि शहरातील प्रतिष्ठित नागरिक मोठ्या संख्येने उपस्थित होते.
- या सोहळ्यादरम्यान एक महत्त्वाचे राजकीय निरीक्षणही चर्चेत आले. शिवसेना तसेच काही अपक्ष उमेदवार व सदस्यांनी या कार्यक्रमाकडे पाठ फिरवल्याचे दिसून आले, मात्र या बाबीचा एकूण सोहळ्याच्या उत्साहावर कोणताही परिणाम झाला नाही. नवनिर्वाचित नगराध्यक्ष सुनील शिंदे यांच्याकडून शहराचा नियोजित विकास, पर्यटनवाढ, मूलभूत सुविधा, स्वच्छता तसेच नागरी समस्या सोडवण्यासाठी ठोस आणि प्रभावी निर्णय घेतले जातील, अशी अपेक्षा यावेळी नागरिकांनी व्यक्त केली.
पदग्रहणानंतर आपला मानस व्यक्त करताना नगराध्यक्ष सुनील शिंदे म्हणाले की, महाबळेश्वरच्या सर्वांगीण विकासासाठी मी प्रामाणिकपणे आणि पारदर्शकपणे काम करण्याचा निर्धार केला आहे. नागरिकांचा विश्वास सार्थ ठरवण्यासाठी नगरपरिषद प्रशासन आणि लोकप्रतिनिधी यांच्यात योग्य समन्वय साधून काम केले जाईल, असे आश्वासन त्यांनी दिले. एकूणच हा पदग्रहण सोहळा महाबळेश्वरच्या राजकीय व सामाजिक जीवनातील एक महत्त्वाचा आणि ऐतिहासिक क्षण ठरला आहे.
