पांचगणी न्यूज नेटवर्क
- प्रतापगड : महाबळेश्वर तालुक्यातील निसर्गरम्य दरे या आपल्या मूळ गावी राज्याचे उपमुख्यमंत्री एकनाथ शिंदे गुरुवारी दुपारी हेलिकॉप्टरने दाखल झाले असून, त्यांच्या या तीन दिवसांच्या मुक्कामाकडे संपूर्ण राज्याचे लक्ष वेधले गेले आहे. अधिकृतरीत्या हा दौरा पूर्णपणे ‘खाजगी’ असल्याचे प्रशासनाकडून सांगण्यात येत असले तरी, सध्याची राजकीय परिस्थिती पाहता हा केवळ विश्रांतीचा दौरा नसून यात आगामी निवडणुकीचे आणि सत्तासमीकरणांचे मोठे डावपेच दडले असण्याची दाट शक्यता राजकीय वर्तुळात वर्तवण्यात येत आहे. दुपारी ३ च्या सुमारास दरे येथील हेलिपॅडवर आगमन झाल्यानंतर जिल्हा प्रशासनाच्या वतीने त्यांचे जंगी स्वागत करण्यात आले, त्यानंतर त्यांनी थेट आपल्या निवासस्थानी मुक्काम केला आहे.
विशेष बाब म्हणजे, सातारा जिल्हा परिषद अध्यक्ष, उपाध्यक्ष आणि सभापती पदांच्या निवडीची प्रक्रिया नुकतीच पार पडली आहे. या निवडीनंतर उपमुख्यमंत्री शिंदे यांचा हा पहिलाच जिल्हा दौरा असल्याने स्थानिक राजकारण्यांच्या नजरा दरे गावाकडे लागल्या आहेत. सातारा जिल्ह्यावर आपले राजकीय वर्चस्व कायम राखण्यासाठी आणि महायुतीची पकड अधिक मजबूत करण्यासाठी शिंदे या मुक्कामात काही महत्त्वाचे निर्णय घेण्याची शक्यता आहे. या दौऱ्यात ते केवळ आपल्या शेतात वेळ न घालवता, जिल्ह्यातील प्रलंबित विकासकामे, विशेषतः तापोळा-महाबळेश्वर भागातील पर्यटन प्रकल्प आणि रस्ते बांधणीच्या कामांचा स्थानिक अधिकाऱ्यांकडून आढावा घेऊ शकतात.
याच कालावधीत जिल्ह्याचे पालकमंत्री शंभुराज देसाई यांच्यासह जिल्ह्यातील महत्त्वाचे शिवसैनिक आणि पदाधिकारी उपमुख्यमंत्र्यांची भेट घेण्याची शक्यता आहे. या भेटींमध्ये आगामी स्थानिक स्वराज्य संस्थांच्या निवडणुकांची रणनीती, जिल्ह्यातील पक्षविस्तार आणि कार्यकर्त्यांमधील मरगळ झटकण्यासाठी विशेष चर्चा होऊ शकते. पश्चिम महाराष्ट्राच्या राजकारणात सातारा जिल्ह्याचे महत्त्व मोठे असल्याने, दरे येथील या ‘निवांत’ मुक्कामातून एकनाथ शिंदे नेमका कोणता राजकीय संदेश देतात, हे पाहणे आता महत्त्वाचे ठरणार आहे. प्रशासकीय प्रोटोकॉल पाळला जात असला, तरी दरे गावातील या हालचालींनी सातारा जिल्ह्याच्या राजकीय वातावरणात मात्र मोठा उकाडा निर्माण केला आहे.
