पांचगणी न्यूज नेटवर्क
महाबळेश्वर : जीवनातील अनंत संघर्षांवर मात करत आपल्या कार्यक्षेत्रात उत्तुंग यश संपादन करणाऱ्या आणि समाजासाठी प्रेरणादायी ठरणाऱ्या कर्तृत्ववान महिलांचा महाबळेश्वर येथे ‘वूमन एक्सलेन्स अवॉर्ड’ देऊन गौरव करण्यात आला. भारत बियाँड बॉण्डरीज फाउंडेशनच्या वतीने आयोजित करण्यात आलेल्या या विशेष सोहळ्यात विविध क्षेत्रांत उल्लेखनीय योगदान देणाऱ्या महिलांचा सन्मानचिन्ह व मानपत्र देऊन सन्मान करण्यात आला. या कार्यक्रमामुळे पर्यटननगरीत महिला सक्षमीकरणाचा एक नवा उत्साह पाहायला मिळाला.
या गौरव सोहळ्याचे आयोजन फाउंडेशनच्या संस्थापिका डॉ. भाग्यश्री मोहन शिंदे यांच्या मार्गदर्शनाखाली करण्यात आले होते. त्यांच्याच हस्ते या पुरस्कारांचे वितरण करण्यात आले. यावेळी सामाजिक कार्यकर्त्या शिवानीताई कळसकर, डॉ. अनुराधा दिवेकर, नीलम टांगारी आणि स्मिता रांजणे यांना शाल, सन्मानचिन्ह व पुष्पगुच्छ देऊन गौरविण्यात आले. सन्मानित झालेल्या या प्रत्येक महिलेने शिक्षण, समाजसेवा आणि आरोग्य अशा विविध क्षेत्रांत आपल्या चिकाटीच्या जोरावर एक वेगळी ओळख निर्माण केली आहे. त्यांच्या कार्याचा गौरव होत असताना उपस्थितांनी टाळ्यांच्या कडकडाटात त्यांना दाद दिली.
याप्रसंगी बोलताना डॉ. भाग्यश्री शिंदे यांनी स्पष्ट केले की, महिलांमध्ये उपजतच प्रचंड क्षमता आणि नेतृत्वगुण असतात. प्रतिकूल परिस्थितीशी दोन हात करून त्या प्रत्येक क्षेत्रात स्वतःचे स्थान निर्माण करत आहेत. त्यांच्या याच जिद्दीचा आणि समाजाप्रती असलेल्या निष्ठेचा सन्मान करणे हे आमचे कर्तव्य आहे. अशा पुरस्कारांमुळे महिलांचा आत्मविश्वास वाढून त्यांना भविष्यात अधिक जोमाने काम करण्याची प्रेरणा मिळते. सन्मानित महिलांनीही आपल्या भावना व्यक्त करताना हा पुरस्कार म्हणजे आमच्या सामाजिक जबाबदारीची जाणीव करून देणारा क्षण असल्याचे सांगितले. या सोहळ्याला परिसरातील मान्यवर मोठ्या संख्येने उपस्थित होते.
