पांचगणी न्यूज नेटवर्क
पाचगणी: शेअर मार्केटमधील गुंतवणुकीच्या नावाखाली आणि जादा परताव्याचे आमिष दाखवून शेकडो नागरिकांची आर्थिक फसवणूक केल्याचा धक्कादायक प्रकार पाचगणी परिसरात उघडकीस आला आहे. याप्रकरणी प्रणाली संदीप देसाई (रा. पाचगणी, मूळ रा. वाडकरवाडी चिखली, ता. वाई) यांनी पाचगणी पोलीस ठाण्यात तक्रार अर्ज दाखल केला असून, ‘शिमप्ली एम्पायर’ आणि ‘शिमप्ली फायनान्शिअल कन्सल्टन्सी’च्या संचालकांविरुद्ध महाराष्ट्र ठेवीदारांच्या हितांचे संरक्षण कायद्यांतर्गत गुन्हा दाखल करण्याची मागणी केली आहे. या तक्रारीमुळे गुंतवणूकदारांमध्ये मोठी खळबळ उडाली असून फसवणुकीचा हा आकडा मोठा असण्याची शक्यता वर्तवण्यात येत आहे.
या प्रकरणाची पार्श्वभूमी अत्यंत नियोजनबद्ध असल्याचे तक्रार अर्जात नमूद करण्यात आले आहे. संशयित आरोपी शीतल अविनाश जगदाळे आणि हिमांशू दीपक शर्मा यांनी सन २०२१ पासून महिलांसाठी विशेष ऑनलाईन शेअर मार्केट ट्रेडिंग क्लासेस सुरू केले होते. झूम ॲपच्या माध्यमातून चालवल्या जाणाऱ्या या क्लासेसमध्ये सुरुवातीला अत्यंत कमी फी आकारून महिलांना आकर्षित करण्यात आले. सुरुवातीला केवळ प्रशिक्षणाचे स्वरूप असलेल्या या व्यवसायाचे हळूहळू मोठ्या गुंतवणूक योजनेत रूपांतर करण्यात आले. विश्वासाच्या आधारे अनेक गुंतवणूकदारांकडून मोठी रक्कम गोळा करून ती ठरल्याप्रमाणे परत न करता फसवणूक केल्याचा आरोप तक्रारदारांनी केला आहे.
या संघटित आर्थिक गुन्ह्याबाबत पाचगणी पोलिसांना दिलेल्या अर्जात भारतीय न्याय संहितेच्या विविध कलमांसह आर्थिक गैरव्यवहाराच्या कायद्यानुसार कठोर कारवाई करण्याची मागणी करण्यात आली आहे. संशयित आरोपींनी केवळ पाचगणीच नव्हे तर वाई आणि सातारा जिल्ह्यातील अनेक सामान्य नागरिकांना आपल्या जाळ्यात ओढल्याचे समोर येत आहे. पाचगणी पोलीस स्टेशनच्या अधिकार्यांनी या तक्रारीची दखल घेतली असून, या प्रकरणाचा सखोल तपास सुरू करण्यात आला आहे. सर्वसामान्य नागरिकांनी अशा कोणत्याही अमिषाला बळी पडू नये, असे आवाहनही या निमित्ताने केले जात आहे.
